काठमाडौँ । विवाहपछिको प्रेम, समर्पण र पारिवारिक सम्बन्धका उतारचढावलाई केन्द्रमा राखेर निर्माण गरिएको नेपाली फिल्म ‘काजी’ को ट्रेलर सार्वजनिक गरिएको छ ।

सार्वजनिक ट्रेलरमा दाम्पत्य जीवनमा आउने भावनात्मक संघर्ष, आपसी विश्वास, जिम्मेवारी र सम्बन्धभित्रका संवेदनशील क्षणलाई प्रस्तुत गरिएको छ । पारिवारिक कथावस्तुमा आधारित फिल्मले दर्शकलाई प्रेम र त्यागको अनुभूति गराउने संकेत ट्रेलरले दिएको छ ।

फिल्ममा अभिनेता विपिन कार्की ‘काजी’ को भूमिकामा देखिएका छन् भने अभिनेत्री केकी अधिकारी ‘कजिनी’ को भूमिकामा प्रस्तुत भएकी छन् । दुवै कलाकारको अभिनय र भावनात्मक प्रस्तुति ट्रेलरमा आकर्षक देखिएको छ ।

निर्माण टिमका अनुसार फिल्मले नेपाली समाजमा विवाहपछिको सम्बन्ध, जिम्मेवारी र प्रेमको वास्तविक पाटोलाई चित्रण गर्ने प्रयास गरेको छ । ट्रेलर सार्वजनिक भएसँगै फिल्मप्रति दर्शकको उत्सुकता पनि बढेको छ ।